حا تكمل لوحدك

كتبت

نيروز الطنبولي

=============

خلاص حتكمل لوحدك
جملة صعب علينا استيعابها …

قاسية جدا على نفسيتنا بحكم الاعتياد أو الاحتياج أو العشق والتعلق بشخص ما !

قرار

بنهرب منه كلنا وأحيانا بنندم بعد ما بناخده وبنقسى بشدة على صاحبه وبنتهمه بالخيانة للعشره أو عدم التقدير .
وكتير بيكون مهم إننا نبادر ونقوله لانه أصبح الحل الوحيد لمشاكل كتير مالهاش حل ومش قادرين نكمل واحنا شايلينها فوق ظهرنا.

وكتير منا بيقحم نفسه في المشاكل دي ويظل يعاني وقابل للمعاناة حتى لا يتلفظ بالكلمتين دول

(خلاص حتكمل لوحدك) !
صدقوني

الكلمة دي لما بسمعها من حد بيقولها لحد تاني أنا بتأثر وبدمع ومش بعيد اني أبكي ولو في فيلم سينيما بالرغم من أنها حل وحل مسالم جداً مافيهوش أي تهكم أو بيع للعشرة كما يبدو ولكن هو فعلاً قرار صعب،
صعب علينا اننا نقوله لشركاء عمل خدنا وادينا مع بعض سنين وكان بينا حلم عايزينه يكمل وتأكدنا ان مافيش في لمتنا أمل.
أو علاقة صداقة وأخوة بفعل شيطاني اتقلبت غيرة وحقد وضغينة فكفاية اللي وصلناله ومش لازم نقطع في بعض ونبعد بقى ونسيب الزمن يصفي قلوبنا لكن المهم بلاش تدمير أكتر.
ولا علاقة حب بين راجل وست اتجوزوا وخلفوا وانشغلوا عن الهدف الأساسي من العلاقة ونسوا كل المشاعر الحلوة والاحداث القاسية اللي تخطوها سوا والعشرة والمخدة الواحده اللي جمعتهم لسنين فقرروا يسيبوا بعض أيا كانت النتائج يمكن يندموا ويمكن يكون ده الحل الوحيد ولكنه فعلاً شيء مؤلم ومحير في نفس الوقت د… يعني مافيش أمل غير انك تسيبه

وتقوله (خلاص حتكمل لوحدك)!

بس المصيبة الكبيرة واللي أصبحت وارده وبتحصل لما أم تقول لابنها (خلاص انت هتكمل لوحدك) أصلها ما بقيتش قادرة تعيش لوحدها ولازم تتجوز حد يصرف عليها وقابلها من غير عيالها فتقولهم … !

ولا أب عجز عن الكسب ولقى نفسه مش قادر يكمل مع ولاده ويصرف عليهم فيقولهم …
آه على الوجع اللي مالي القلوب
وآه من الألم اللي أصبح مابينا شيء من طبيعة الوجود…

ودّع لما مايكونش غير الوجع مفروض
وحط في بالك أن بالأمل يحلى الوجود
وأن رب العباد أنيسك للأبد موجود موجود